Verbindieng mêêr dan gelukt op Flakkee
Actueel 130 keer gelezen‘t Zal ruum ‘n halfjaer geleje weze, dat ‘k ‘n biezoender echtpaer tegen ‘t lief liep uut Menheerse. Biezoender omdat ‘t mien opviel hoe ze maensen van allerlei pluumage bie elkander wiste te briengen.
Eigenluk begon ‘t mit ‘n workshop om ‘n kersttak te maeken in de kas van Hernesseroord in Menheerse. Had m’n eige daervoor opgegeve in waerachtig, we warre mit vuuftien vrouwen die meedeje. Sommige mannen die meekwamme, maekten oendertussen ‘n praetje mit mekaore. Daer kwam Heleen van der Meijden naer m’n toe, want heur was de verbinder, saeme mit Wijna Westra, oak altied ‘n gezellig maens. Ze leie oens uut, hoe m’n te waerek moste gaen in allemaele leefden m’n oens uut. Mit moaie resultaeten.
Heleen vroeg mien om Sinterklaosverhaelen in ‘t Flakkees dialect voor te komme lezen bie heur thuus. Precies op vuuf december, de verjaerdag van de Sint. Kwam dat moai uut! Mar liefst 20 genoadigden kwamme daer op of, wat ‘n dankbaer publiek had ‘k! Hêêrlijk om mee te maeken. Iederêên heit genote van diejen aevend.
Mar dat was nog nie aolles, want d’r kwamme nog mêêr verzoeken, zoas sterren kieke bie de huusarts in Sommerdiek mit ‘n woendermoai verhael van Jelier, die oens, 80 mannen in vrouwen, de geheimen van de sterren in ‘t hêêlal uut de doeken deej. Biezoender lêêrzaem, dat mot gezeit worre.
In mit ‘n groep beweuners uut Oekraïne gienge m’n lessen Nederlands vollege. In ‘t Diekhuus vloge hêêl veul woorden over de 6 taefels, die gevurmd wiere. We lêêrden over in weer. In as ‘k noe op ‘t durp laope in ‘k kom Oekraïners tegen, maeke m’n altied ‘n praetje. In as dat nie meugeluk is, dan zwaoien m’n naer mekaore. Dus ‘t heit z’n vruchten ofgewurpe, die les, waer Heleen in Wim, mit Bert saeme d’r eige voor inzette. ‘n Buutengeweune verbindieng is ‘t.
Wim in Heleen hao ‘n kaereklukke achtergroend in binne lid van de Exoduskerk in hao ze oak d’r plekke ingenome bie Vurming in Toerustieng, ‘n gezaemelukke commissie van Exoduskaerek in Emmaüskaerek. Wim studerende geneeskunde in gieng bie de Marine op het fregat Van Speijk, toen ‘n z’n doktersbul behaeld had. Heleen heit de PABO ofgeroend. Wim waerekende nae de diensttied in ‘n ziekenhuus in Arnhem op verloskunde in was daer gynaecoloog. Hie kwam destieds in contact mit Erasmus MC Rotterdam, in roendde oak z’n opleidieng dermatoloog of. ‘t Gezin mit 2 zeuns, verhuusde zodoende voor drie jaeren naer Papoea Nieuw-Guinea.
Nae ‘t pensioen van Wim verhuusden ze nogmals naer Yorkshire (3 jaer) in naer Noord-Wales in Iengeland (1,5 jaer). Nae ‘n halve êêuw inzet voor de zieke maens, streke ze neer in Menheerse.
