In ‘n riejtuugie naer ‘t Diekhuusplein

Spannieng roendom de Kaoje van Menheerse. In hoewel d’r hoenderden mamma’s in pappa’s staen mit d’r kroast, ken je haest ‘n spelle hore valle. Allemaele in ofwachtieng van Sinterklaos in z’n Pieten, want ze zalle ankomme mit de boat, helemaele uut Spanje in das ‘n aande weg oor!

‘n Klein ventje, die op de schoeren van z’n vaoder zit, vraegt: “Waer is sinterkloas noe? Ik zien ‘n naeregens…” Pâ zeit: “Je ken die boat noe nog niet zien, die is nog te veare weg in ‘t kanaal, hier naertoe.” Noe ja, dan mar wachte eej op diejen Goedheiligman. D’r zit niks aores op. Mar iederêên is stille, tis oak zo spannend!

In jao oor, daer komt de boat! Voorop vol mit echte Zwarte Pieten, mit een paer Roetveeg Pieten, dat wel. Da’s d’n nieuwen tied eej. De boat, de MD3 wel te verstaen, leit an langs de kaoirand an de Spuistraete. 

Oenze burgemêêster begeleidt Sinterklaos naer de wal. Tis oak al ‘n ouwe man, hao wel hôre zeagge, dat ‘n wel hoenderd jaer al is. Mar aolles gaet goewd. Z’n hoadpiet is d’r vanzelfsprekend oak bie. 

Noe voend ik zelluf deze Piet wel ‘n beetje somber kieke, d’r kon gêên lachie van of. Sinterklaos was ‘’n stik vrolieker, hie gieng an weerskanten van de straete langs de kinders, in maekende ‘n praetje mit ze in nam kleurplaeten in ontvangst. De Pieten gavve de kinders ‘n zakkie mit kruudneuten in snoepies, in ze waere in ‘t rôôd of blauw geklêêd. 

Eên valt zeker op in ’t gezelschap, die Piet is in ‘t groen. Da’s ‘n Piet die mit speciale zakkies roendloapt mit glutenvrieje neuten in snoepgoed, want d’r binne noe êênmal kinders die geen gluten kenne verdraege. Moai dat hier oak an is gedocht. In die kinders hao ‘n speciaal bordje op d’r jas zitte, zodat de Gluten Piet heulie herkent. 

Nae ‘n lange roendgang langs de Kaoje is ‘t tied voor Sinterklaos in z’n hoadpiet om plaets te neme in ‘n riejtuugie mit zo’n moai bloend Fjordenpaerd d’r voor. Ze gaen naer ‘t Diekhuusplein, want daer staet ‘n massael publiek de Sint op te wachten.

‘n Groep meiden doet d’r uuterste best mit allerlei danspasjes, zo leuk om te zien hoeveel waerek ze daer van gemaekt hao. Deur de luudsprekers van Happy Music klienke toffe Sinterklaos liedjes. De maensen zienge gezellig mee. ‘n Hêle serie luchtbellen vliegt uut ‘n kassie op ‘t podium. In Ab van der Valk praet aolles moai an mekaore in koendigt z’n gasten an in is blieje dat ‘n weer die lange tocht mit die boat heit gemaekt om aolle kinders te plezieren. ‘t Was geweldig!