Bienaemen in plat Flakkees

Middelharnis wordt al êêuwen Menheerse genoemd. Zellufs buuten Flakkee kenne veul maensen die’jen naem.

Melissant staet bekend as ‘t Geitendurp. De geit wordt ommers wel ‘s de koeje van de aereme man genoemd. Veul landaerebeiers hadde behalve ‘n vaereke voor de slacht oak ‘n geit voor de mealuk. Of d’r noe in Melissant mêêr geiten waere te vinden is de vraeg, mar Melissant heit noe êênmal de naem.

Dirksland wordt Klein Parijs of ‘t Stropdassedurp genoemd. Dirkslanders binne ommers van huus uut trotse maensen. “Zellufs landaerebeiers gienge mit ‘n stropdas naer ‘t hof”, wier ôôit gezeit. Mar of dat waer was, betwufele’k. ‘t Lieken m’n mêêr dat de mannen ‘n overhemde in ‘n broek mit bretels an hadde in ‘t land, in as ‘t kouwer was, daer overheene nog ‘n jas. Wel ‘n korten, want dan konne ze beter op d’r knieën waereke. Om aerepels te raepen, kôlen te sniejen of juun om d’n dorden doewn.

Sommerdiek wier deur de Menheersenaers wel ‘s, enigszins minderwaerdig, ‘t Stroentpittedurp genoemd. In Sommerdiekers binne oak wel te herkennen an ‘n zakje oender d’r snelbinders van d’r fiets. Bie oenderlienge ruzies tussen Menheersenaeren in Sommerdiekers wiere die van Menheerse uutgescholle voor Koaiers, deur de visserieje daer. In de jongelui uut ‘t agrarische Sommerdiek wiere dan uutgemaekt voor Kluuten. De algemêên bekende bienaem voor Menheersenaers is Knikkertuuten, een zogenaemd knikkerzakje. Jae, knikkeren deje m’n vroeger as kind op straete of binnenshuus op de vloere, waer m’n mit kriet ‘n knikkerpotje tekendene.

Een aere naem voor Nieuwe-Tonge is Nazareth. De inweuners worre Blauwkousen genoemd, want in de regel droege m’n op ‘t eiland zwarte kousen, behalve in Nieuwe-Tonge. Daer wiere doenkerblauwe kousen gedroge.

Haerekeneezen hieten oak wel Panhaeringen, omdat deze vissoorte vroeger veul gevangen wier, in nie allêên op Haereken.

Bommelaers wiere steevast Horrekiekers genoemd in Ouwe-Tongenaers Grippeschieters of Natgatten. ‘n Grippe is ‘n droage greppel in goewd Hollands.

Ouddurpers staen bekend as Duun’aezen. In as je achter ‘t Duunhekkie weunende, dan was je eigenluk nie zo goewd bie je hoad… ‘n Aerege vuroenderstellieng, toch?

Goereeërs worre deur Ouddurpers voor Klokkedieven uutgescholle. De gelieknaemege tonêêlspeulers uut Goerie heit daer d’r naem vandaen.

De vangst van garnaelen oftewel gornaet was vroeger ‘n belangrieke inkomstenbron voor Stellendammers. Daerom Stellendamse Gornaetkoppen, Gornaetpikkers in Gornaetsnokkers. Mar ze staen oak wel bekend as Pieneuteschillers of Moaten.

Stad an ‘t Haeringvliet wordt deurgaens te boek gesteld as Stadje Droagbrôôd. Iederêên spreekt over Stad, niet die lange naem. Ze hao daer ‘n aep lêre bidde…

Inweuners van de Plaet (Ooltgensplaat) hadde altied al ‘n slechte naem. Ze hietende Windbuulen, zogenaemde wilde personen. D’r wier oak wel gesproke over Plaetse Messestekers.

Tis mar ‘n globaal verhaeltje over plekken in bienaemen, mar wel leuk om te lezen. Vinde juulle oak nie?