Oud worre...

Iederêên wil graeg oud worre, mar nie weze. In gêên maans wil hoare of maareke dat ie d’r oud uut ziet. Mar of in toe een compliment kan mien dag hêêlemael goed maeke.

Gister kwamme m’n trug uut Rotterdam in al van vaare zag ik m’n lieveliengs deklôôzen staen. Mit z’n emmer in z’’n zêêm, stieng die bie ’t stoplicht. Al mêêr dan tien jaer hê m’n een soort band, zak mar zage. Vroeger verkocht hie de deklôôzekrant op Zuudplein. Daer kwam ik dikkuls, voor m’n waark in dan gaf ik een fôôitje. Zo kwammen m’n een kêêr ‘an de praet.’

Op een dag zeitie: ik bin voor een fekansie an ’t spaere. Noe kan ik aerdig begrip voor allerlei fratsen opbrienge, mar ‘n deklôôzen die op fekansie gaet, vin ik roar, jule nie dan? Dus ik vraeg, zoender nae te dienke:

‘Gae ‘j dan een weekie oender een aore brug lage? ‘k Schrok d’r zelluf ôôk van or, mar gelokkig, híe viel haest om van de leut. Nee hie gieng echt op fekansie in ik gunnende ’t m wel. Van of dien dag, zwaoie m’n nae mekaor. Noe staet ie weer al jaeren bie ‘t stoplicht te zêême. Mêêstal rieje m’n al deur, mar dan steek ik m’n hand uut in geef ‘m een euro. Ik roep dan altied:

‘Prettig weekend lekker stuk,’ hie niept dan altied even in m’n hand en zeit:

‘Bedankt schoonheid!’ Nou ja, daer doei ‘t voor eeh? ’t Is goekôôper dan botox, in op mien heit ’t ongeveer ‘t zellefde effect. Ik hê eerlik gezeit al aerdig in die vent geïnvesteerd de leste jaeren.

Dien bewusten dag kon ‘k zeker wel een oppepper gebruuke. M’n hadde mêêr as een uur naer een beige truitje gezocht. D’r warre d’r zat, mar allêên in maetje 34-36 of 38, in bie mien staet d’r tegenwoordig een viertie voor. In ’t is net as mit je leeftied, mit een viertie d’r voor, wor alles wat minder.

Dus toen ‘k ’m zag, stak ik al vaar van te voren m’n aarem uut ’t raempie. Eventjes rochte m’n mekaor an, ik zei net as altied: Prettig weekend lekker stuk, in hie riep: Bedankt… moeders. 

Pas vlak voor d’n ofslag naer ’t crematorium droeng ’t hêêlemael deur. MOEDERS!? Daer betael ik nie voor! D’r was gêên parkeerplek in de buurt anders ha’k daer even kenne bekomme. Hêêl de trugweg hek ‘r an gedocht. Ik maekende allerlei plannen voor de volgende kêêr. Eêrst docht ik; die vent? Daer kiek ik geweun nóóit mêêr naer, laet t‘m verekke!

Of ik zaag: ‘kiek joe zelluf nooit in een spiegel?’

Afijn, ‘k hê d’r een paer daegen behôôrlik last van g’ had.

Mar ik bin d’r uut. Ik verhôôg ‘t bedrag mar ’s naer twêê euro. Das dienk ik de beste oplossing, in botox wor toch ôôk elleke kêêr dierder!