Gebroeders an Menheerse haeven

Kunstenaer Jaop Rêêdiek uut Sommerdiek heit z’n eige altied verbaesd dat ‘r niks is terug te vinden over de gebroeders Han en Rien Boomsma in de gemêênte. “Ze hao zoveul betekend dat ze ‘n vernoeming mêêr dan verdiene”, zeiten d’r zelluf over. In daerom wou ‘n un kunstwaerek maeke.

‘t Was in beginjaeren tachtig van de vorige êêuw dat Jaop z’n êêrste oriënterende gesprek had mit de toenmaelige burgemêêster Van Welsenis. ‘t Idee was om iets neer te zetten bie de haeven van Menheerse dat ‘t verleden in heden mit mekaore zou verbinde. Un soort deurkiekje naer de geschiedenis van ‘t durp mit daerin ‘n antal bekende durpsfiguren. Van Welsenis was enthousiast in de kunstenaer wearekende z’n plan uut. Mar deur ‘t heengaen van de heer Van Welsenis bleef dat plan oak in de lae laegge. Jaop heit nog ‘n kêêr mit ‘n ambtenaer over z’n plan gesproke, mar daernae bleef ‘t aekelug stil.

“Mar toen kwam ‘t jaer 2012. De haevenkanalen van Flakkee binne unieke elementen in ‘t landschap. Ze binne nauw verboende mit ‘t onststaen van ‘t eiland in kenne gezien worre as ‘n verbindend element. Deur steeds vaerdere inpolderieng kwamme de durpen vaerder van de zêê te laeggen in was ‘t noadug ‘n kanaal an te laeggen. ‘t Kanaal gaf toegang tot ‘t open waeter voor visserieje, transport in ofwaeterieng.
Vandaege d’n dag hao de haevenkanalen voornaemeluk ‘n toeristische of ‘n recreatieve functie. In ik wier uutgenoadugd deur de gemêênte om m‘n ontwaerep van ‘t kunstwaerek da’k in gedachten had al dien tied, te presenteren. In opdracht van ‘t Intergemêênteluk Saemenwaerekiengsverband Goeree-Overflakkee (ISGO).

In jae, ik wiste dat ‘k m’n plan van toen onveranderd uut kon voere”, zeit Jaop. “Ik wou ommers graeg ‘n êêrbetôôn maeke an de gebroeders Boomsma in dat most ‘n plekke kriege an de haeven waer de twêêlieng zo vaek was, ze hadde ommers wat mit ‘t waeter. 

Hoeveul kêêren ze nie langs ‘t Viengerlieng hao geloape in d’r kenmaerekende pas, in hoeveul ze de Wilhelminabrug hao gepasseerd, zal niemand wete. Mar ze waere bekende maensen, da’s zeker. 

Ze hao veul betekend in verênegiengen, ‘n grôte rol gespeuld in ‘t verzet in d’n oorlog, in ‘t eiland uutgebreid in beeld gebrocht deur d’r beeldmaeteriael. Vanuut oender andere Indonesië kwamme de foto’s in dia’s, die in ‘t land wiere vertôônd, oak in Menheerse.”

Volgens de kunstenaer houwe verhaelen van vroeger de herinnerieng an heulie levend in hie zeit dat z’n kunst ‘n bevestigieng hiervan is. Hie is oak blieje dat ‘n de gebroeders persoonluk gekend heit. “Ik voend ‘t ‘n genot om bie heulie an de taefel te zitte in de foto’s te bekieken in d’r verhaelen an te hôren.”

- Cora de Boed