Fillumopnaemes kenne hêêl lang dure!

Bie ‘t maeken van ‘n bioscoopfillum komt ‘r hêêl wat kieke. Dat oendervoende de medewaerekers van de RTM in april 2010 in Ouddurp an d’n Brouwersdam, noe ruum vuuftien jaer geleje. ‘t Was allemaele te doen om de fillum Sonny Boy, naer ‘t gelieknaemige boek van Annejet van der Zijl in Maria Peters had diejen dag de registraesie in handen. Maria is bekend van fillums as Kruimeltje in Pietje Bel. Die hao juulle vast wel ‘s geziejn.

Zo’n dag begint vroeg, al om zes ure ‘s ochens. Op dat tiedstip moste de stoomloc, twêê diesels, riejtuugen in bienae alle goederenwaegons naer buuten getrokke worre. De voorverwaeremde stoomloc wier op druk gebrocht, want om acht ure komt ommers ‘t materieel volop in actie. 

Drie bussen arriveerden om zeven ure, vol mit figuranten, wel twêêhoenderd. In ‘n grôte tente op ‘t parkeerterrein, tegenover de remise van de RTM, wiere ze allemaele angemeld. Ze wiere geliek deurgesteurd naer de kapper, om ‘n kapsel uut de jaeren ‘40 angemete te kriegen. Daernae krege ze ‘n Duuts uniform of kampklêdieng. De lejen van Ensemble Eêuwkant kwamme in Flakkeese klêderdracht anrieje. Daer warre oak kinders bie. Heulie warre de figuranten in de passagierstram. De opnaemes bestreke de perioden 1928 in 1944. 

De êêrste scène die gedroaid wier, gieng over ‘t vertrek van de vrouweliejke hoofdpersoon vanuut Goedereede naer D’n Haeg, waer ze ‘n pension begon. De twêêde had betrekkieng op ‘t transport per goederenwaegon vanuut Kamp Vught naer Duusland. In dat gaet nie zomar. Voorof drie kêêr repetere, dan de opnaemetrack. Op ‘n bepaeld moment wordt ‘r gezeid: Stop! Begin opstellieng, klaer staen, twêêde opnaeme. In dat dus ‘n kêêr of achte. De acties waerbie geholpen wier gevangenen healepe op te stappen in de goederenwaegon, wiere van bovenof opgenome. Daernae nog ‘n antal opnaemes mit ‘n riejende camera op de rails. Om 14.00 ure was deze klus geklaerd. 

Nae ‘n uurtie pauze vertrokke de filmcrew in de figuranten naer een barricade, die was opgewurpe op de rails. De tram mit de gevangenen wier daerdeur gedwoenge om te stoppen in wier beschote. Om d’r vege lief te redden, sproenge de gevangenen uut de waegons. Sommige wiere ‘dôjeluk’ getroffe in viele op de groend. In om ‘t gehêêl compleet te maeken, gieng de passagierstram, getrokke deur de stoomloc, nog veule maelen heen in weer. Voorstellend de rit van de stad Goedereede naer Menheerse-haeven. 

Alle scènes wiere om acht uur ‘s aeves tot tevredenheid gesteld deur de regisseur. D’r warre complimenten voor de RTM medewaerekers. Want mot je wete, die warre om half tien pas klaer mit d’r waerek. Alle voertuugen moste ommers weer de remise in.