‘Is ‘t gras noe echt groener bie de buurman?’

Tis ‘n hête zeumer dit jaer, net as de vorige jaeren ‘t geval was. Gletsjers in de beargwaereld krimpe in zurrege voor overstroamiengen in de daelen. Stikken ies op de Noordpool breke of in drieve zellufstandug vearder… Tis waer, ‘t klimaat verandert op veul plekken in de weareld. In dat meareken m’n allemaele. 

Mar waer ‘k ‘t noe eigenluk over wil hao, is ‘t gras in deze periode van ‘t jaer. In dat ‘t gras groener zou weze bie de buren, dat ken d’r bie mien nie in. ‘n Hoap maensen dienke dat, dat ‘t daer beter is dan bie d’r eige. Welnêênt! Of ze binne jeloers op maensen in heulie zellufde straete, dat daer aoles van ‘n lei’je dekkie gaet, da’se alles beter hao. Daer hao ‘k gelokkug nôôit gêên last van gehad. Eenieder mot mar kieke wat ‘n dienkt dat ‘t beste is, zal d’r nie wakker van leagge.

Mar da’k ‘t noe over echt gras wil hao, komt eigenluk van ‘n fotootje uut Noorwegen da ‘k oenderlesten zag op Facebook. Daer stienge twêê mannen mit ‘n zeis op ‘n begroeid dek van ‘n huusie ‘t gras te maoien. In daer kon je netuurluk oak wat bie schrieve in dat hao ‘k gedaen. Ik zeagge: Dan zet je d’r toch ‘n paer geiten op? Die vrete dat gras wel weg oor. In toen was d’r ‘n vent die antwoordende mien, are you serious, mêên joe dat noe echt? Hie kon ‘t nie geloave. 

Mar ‘t is zeker echt zo, hao ‘t zelluf gezien in ‘k hao d’r oak ‘n foto van gemaekt, van die geite die op ‘n schuin dek staet, hoag in de bearegen. Dat land daer of beter gezeid de wei-en van 5.000 hectaere, binne van boer Urzan Dale in z’n vrouwe Åshild, waer m’n êêrst ‘n speciale maeltied gegete hao, thuus bie heulie op d’r boerderieje.

M’n krege hapjes mit ‘n stikkie broad, kaeze in gedroagde worste. Daernae Rømmegrut, ‘n soort gortepap mit road bessesap d’r overheen. Åshild had van dat sap ‘n grôte panne gemaekt. In as je van gortepap of kwark in yoghurt houdt, dan bin je daer goed of! In heulie weie staen geiten, schaepen in Fjordenpaerden. 

Trug naer oenze situasie op Flakkee. Bie lange droagte zoas noe is ‘t belangriek om ‘t gras in eige tuun hoager te maoien dan geweunluk, op ‘t juuste moment van de dag. In mit schearpe messen om uutdroagieng in schaede te voorkommen. Doe je dat nie, dan ken de grasmat ofsteareve. 

De voordêlen van ‘n grasdek op je huus houdt waeremte in de winter vast in in de zeumer de hitte buuten. Binnentemperetuur bluuft constant in energiekosten kenne daele. Da’s moai toch?

Het Flakkees is het dialect van Overflakkee. Net als het Goerees op Goeree behoort het tot het Zeeuws, hoewel het op Zuid-Hollands gebied gesproken wordt. (Wikipedia)