Vanuut de locht liekent ‘t ‘n acht!

De naem Acht’huuzen zou ofkomstig weze van ‘n gebouw dat uut acht huuzen bestieng, bedoeld voor landaerebeiers uut Noord-Braebant. Veul van die Braebantse seizoenaerebeiers bleven op deze plekke weune. Dat verklaert waerom ‘t durp grôtendêêls katteliek was in nog steeds is. 

In omdat m’n nie zoveul over Acht’huuzen kenne leze in deze krante, gae ‘k mar ‘n kêêrtie hier op in, want ‘k weet dat ‘t ‘n hêêl gezellig durp is, waer je altied zo welkom bint! Trouwens, oak bie buurtschap Langstraete, dat ‘r an vastgeplakt leit. 

Sins 2013 hôôrt ‘t durp Acht’huuzen bie de gemêênte Goeree-Overflakkee. Tot 1966, toen ‘t oenderdêêl wier van de gemêênte Oostflakkee, had Acht’huuzen ‘n biezoendere posisie omdat ‘t twêê burgervaeders had. ‘t Durp wier deurgesneje deur ‘n diek. De êne kante van d’n diek horende bie Ooltgensplaet oftewel De Plaet in de andere kante bie Den Bommel. ‘t Durp heit daerdeur oak nôôit ‘n eigen waepen gehad. Acht’huuzen is ‘n typisch plattelandsdurpje, waer de maensen mekoare nog kenne. ‘t Bezoendere is dat ‘t durp vanuut de locht gezien de vurm van een acht heit. 

De roams-kattelieke kaerke, Oenze Lieve Vrouwe ten Hemelopneming, neemt ‘n prominente plekke in, binnen in buuten de kleine kern. De kaereke is gebouwd in 1846 in in 1865 kwam oak ‘t nonnenklôôster der Fransiscanessen d’r bie. De zusters gavve oenderwies. Bie de evacuaesie in 1944 binne aelle zusters vertrokken in binne nie mêêr teruggekêêrd. ‘t Klôôster doet noe dienst as weunhuus. Ten oasten van de kaereke leit de begraefplaets. An de westzieje is de ôôrsproenkele pastoorsweunieng an de kaereke gebouwd. Hedentendaege ken je ‘t nog bekieke. In in je hoad de historie van zojuust beschreve, opneme. 

In wat ‘r oak ‘n môôi punt is uut de verte, is meulen Windlust, ‘n korenmeulen in is in 1852 gebouwd. Hie heit ongeveer ‘n êêuw dienst gedaen. Vanof 1898 wier Windlust gemaele deur Dirk David van Dijk, Krijn Buijs Cz. in de firma Boets. Vanof 1933 tot 1991 was de meulen eigendom van firma Van Reijen & Zn, die ‘n handel in graenen, vêêvoer, kunstmis in aerdolieproducten dreef. De meulen raekende intussen buuten bedrief in was in de jaeren dudeluk in verval. Roend 1970 vollegende zellufs ‘n onttaekelieng deur de slechte staet.

Roend 1981 starttende d’r ‘n omvangrieke restauraesie, mar ‘t was nie makkeluk om die uut te voeren. ‘t Durende veul langer dan de bedoeling was. Mar, ‘t resultaet van deze restauraesie was evenwel ‘n prima maelvaerdige meulen. In 1991, toen Van Reijen stoppende, wier Windlust eigendom van de Meulenstichting Goeree-Overflakkee. In noe is ‘t altied zo’n leuk gezicht in Acht’huuzen, omdat de meulen geregeld draoit.