Bommenwaereper stort brandend neer

In mei 2025 magge m’n mar liefst tachtug jaeren vrieheid viere, naedat de Twêêde Waereldoorlog ten einde kwam in deze omgevieng waer m’n noe weune. Eén van de verhaelen die ‘k zal brienge in dezen tied, speult zich of in Sommerdiek, 81 jaer geleje.

In de vroege ochend van zoendag 28 mei 1944 roend 2:40 uur verschient ‘n Iengelse Lancaster bommenweareper boven de gemêênte Sommerdiek. ‘t Toestel wordt op de huud gezete deur ‘n Duutse nachtjaeger in probeert uut alle macht te ontkommen. De uut acht bestaende joenge bemannieng oender leiding van Pilot-Officer Allen is echter ‘n gemakkelukke proai voor de zêêr ervaere Staffelkapitän Ernst-Wilhelm Modrow van ‘t beruchte Nachtjagdschwader-1.

Lamgesloge
Naedat ‘t toestel in brand is geschote, cirkelt de lamgesloge bommenweareper nog ‘n antal maelen boven ‘t durp; hie liekent te zoeken naer ‘n geschikte plekke voor ‘n noadlandieng. Mar zovaerre komt ‘t nie, want plotselieng stort ‘t toestel brandend neer achter de boerderieje van weduwe Van der Meijde an d’n Ouwelandsendiek. Da’s recht voor ‘t panêêl wat ‘r noe an d’n diek staet. Ienkele menuten laeter volgt ‘n enurme explosie vanuut ‘t vliegtuugwrak wannêêr ‘n achtergebleve bom ontploft. Deur die luchtdruk loapen twaeluf weunhuuzen in vuuf schuren anzienlieke schaede op. Woenderluk genog raekt slechts êên burger deur roendspriengend glas lichtgewoend an z’n oag. 

Hoe aeres verloapt ‘t voor de bemannieng van ‘t onfortuunlieke toestel. Tussen de wrakstikken worre de zwaer vermienkte resten gevoende van vier inzittenden in oak in de nabije omgevieng worden nog diverse lichaemsdealen gevoende. Eên bemanniengslid heit nog geprobeerd om zichzelluf te redden deur uut ‘t neerstortende vliegtuug te spriengen. Hie overleeft deze val nie en z’n ontzielde lichaem wordt in de vlakbie gelege Diekstraete teruggevoende. 

Op 30 mei 1944 worre de lichaemen van de bemannieng op de begraefplaets van Sommerdiek begraeven. Hemelsbrêêd driehoenderd meter van de crashlocasie. Zij rusten daer hedendaegs nog steeds in vrede. 

In de jaeren negentug van de vorige êêuw hao lêêrliengen van de Technische Schole in Menheerse ter êre van deze bemannieng ‘n monument gemaekt. Tis ‘n kopie van ‘n vleugelpunt van ‘n Lancaster bommenwaereper, die bie d’n ingang van de begraefplaets an de rechterkante is geplaetst. 

Deur de Stichting WO2 Goeree-Overflakkee is ‘n ceremonie gehouwe roend ‘t informaesiepanêêl an d’n Ouwelandsendiek. Naebestaenden van Joseph Friedt uut Canada in George Ried uut Schotland hao ‘t onthuld en wel op 28 mei 2011. Op de begraefplaets in Sommerdiek is gezoenge deur Mannenkoor Oens Koor uut Sommerdiek in waere d’r toespraeken. ‘n Moaie éérvolle herdienkieng. Zukke momenten bluve m’n bie. Om nôôit te vergeten.

De vollegende kêêr kenne jule allemaele nog ‘n verhael uut d’n oorlog verwachte. 

Cora de Boed